Гэрийн тэжээвэр амьтны эрхийг хамгаалах, эзэд нь хариуцлагатай байх орчныг бүрдүүлэх зорилготой “Гэрийн тэжээвэр амьтны тухай хууль”-ийн төсөл эцсийн шатанд орж, Улсын Их Хуралд 2022 оны 09 сарын 26-ны өдөр өргөн мэдүүллээ.

“Гэрийн тэжээвэр амьтны хууль”-ийн төслийг УИХ-н гишүүн Б.Энхбаяр, Ж.Сүхбаатар, Х.Нямбаатар нар болон иргэдийн төлөөллөөс бүрдсэн “Азтай савар амьтанд хайртай залуус” ТББ нар хамтран боловсруулсан билээ.

Хуулийн төслийг өргөн барихаас яг жилийн өмнө манай ТББ-н саналыг нааштайгаар хүлээн авч, залуус бидний хүсэл, зорилгыг тууштай дэмжсэн, төслийн маань санаачлагч болсон УИХ-н гишүүн Баттөмөрийн Энхбаяр болон хуулийн төслийн хамтран санаачлагч Хууль зүй, дотоод хэргийн сайд Хишгээгийн Нямбаатар, Монгол Улсын сайд, Нийслэлийн түгжрэлийг бууруулах үндэсний хорооны дарга Жамъянхорлоогийн Сүхбаатар нартаа амьтанд хайртай хүмүүс, энэхүү хуулийн төслийн үр дүнг шууд болон шууд бусаар хүртэх олон олон хүмүүсийн өмнөөс чин сэтгэлийн талархал илэрхийлье.

Хуулийн төслөө өргөн барьсан нь бидний 9 жилийн турш сайн дурын үндсэн дээр хийсэн ажлын үр дүн, хичээл зүтгэл болон сайн дурын гишүүдийн маань хүсэл мөрөөдөл биелэхэд ойртож буйг илтгэх сайхан үйл явдал боллоо. Хүн болон амьтанд ээлтэй эерэг, хүмүүнлэг нийгэм, хүрээлэн орчныг бий болгохын төлөөх аялал маань амжилттай үргэлжилсээр байна. Санаачлагч нар, төслийн багийн гишүүд, биднийг дэмжиж буй иргэд, байгууллагууддаа чин сэтгэлийн талархал илэрхийлье.

“Гэрийн тэжээвэр амьтны тухай хууль” нь зөвхөн амьтдыг хамгаалахаас гадна, хүн, амьтан хоёрын хоорондын холбоог зохицуулах, хариуцлагатай харилцааг бүрдүүлэхэд чиглэж байгаа билээ. Амьтанд хайртай хэн бүхний хүсэн хүлээж байсан энэ хууль батлагдсанаар Монгол Улсад амьтдын эрхийг хуулиар хамгаалж, хариуцлагатай нийгэм бий болгох томоохон алхам бий болох болно. Гэрийн тэжээвэр амьтдын эрхийг хамгаалах, амьтанд ээлтэй орчин бүрдүүлэх, хариуцлагатай эзэд бий болгоход чиглэсэн энэ хуулийн төсөл бодит байдал болох мөч ойртсоор байна.

Энэхүү үйлсэд оролцсон бүх хүн, хамтран ажиллагч байгууллагуудад чин сэтгэлээсээ талархал илэрхийлье!